ფერწერა

„რუსუდან ფეტვიაშვილის ყოველი ნაწარმოები გაიძულებს იფიქრო, ეძიო, მიაგნო და ყოველივე ამას იწვევს ფაქიზი ფორმა, ელეგანტური ნახატი და შენივთებული კომპოზიცია, რომელიც ჩვეულებრივ ანალიზს არ ექვემდებარება, არც რუსუდანი არც მისი ნახატები არავის გვანან.“ (ჭაბუა ამირეჯიბი)

 

„პირველი შთაბეჭდილება ამგვარია: განიარაღებული ხარ, რადგან შენს თვალწინაა მძვინვარე და თავბრუდამხვევი ფანტაზიის ცხოველმყოფელი ანაბეჭდები. ინსტიქტურად, ქვეშეცნეული ძალის კარნახით ეძიებ ნაცნობს, ყოფითთან შემხებ წერტილს, უეჭველს და სარწმუნოს, ეძიებ იმ ყოფით გარემოს თუ ატმოსფეროს, რომლის წიაღშიც შესაძლებელი იყო წარმოსახვის ამგვარი ზეიმი, დღესასწაული. ერთი სიტყვით, ეძიებ კონტაქტს ყოფით რეალობასთან და ხელმოცარული რჩები, რადგან აქ არ არის ტრადიციული ჟანრული სახესხვაობები, არ არის ნატურმორტები და პეიზაჟები. არც ილუსტრაციები და არც თვალშისაცემი რემინისცენციები. აქ ფანტაზია უაღრესად დინამიკურ, თავბრუდამხვევად მოძრავ, გაშმაგებულ სურათებს ქმნის, რომელთაც არა აქვთ დასაბამი და დასასრული.“ (ანდრო ბუაჩიძის წინათქმიდან)