მთის რაჭა

მთის რაჭა

სერგი მაკალათია

მრავალტომეული თავს უყრის საქართველოს ისტორიისა და ეთნოგრაფიის აღიარებული მკვლევრის, მხარეთმცოდნისა და არქეოლოგის, ნუმიზმატისა და არაერთი მუზეუმის დამაარსებლის,  პროფესორ სერგი მაკალათიას (1893-1974), პრაქტიკულად ყველა შრომას, რომელიც თანამედროვე მკითხველს მისი დიდი ღვაწლის გააზრებასა და გაცნობაში დაეხმარება. გასათვალისწინებელია, რომ ნაშრომთა უმეტესი ნაწილი მხოლოდ ერთხელ, მეცნიერის სიცოცხლეში გამოიცა.

მრავალტომეულის პირველი წიგნი 1930 წელს გამოქვეყნებულ ისტორიულ-ეთნოგრაფიულ ნაშრომს – „მთის რაჭას“ – ეთმობა, რომელიც სრულიად ახალგაზრდა  მკვლევარმა 1926  და 1928 წლებში მთის რაჭაში მოგზაურობის შედეგად დაწერა. ეს გახლავთ პირველი მხარეთმცოდნეობითი ნარკვევი რიონისა და ჭანჭახის სათავეებში მდებარე სამი სოფლის – ღების, ჭიორისა და გლოლის შესახებ. ახალგაზრდა მკვლევარი დროულად მიხვდა, თუ რა მისია ეკისრებოდა – გადაერჩინა და შთამომავლობისთვის შემოენახა რაჭის მაღალმთიანი სოფლების 20-იანი წლებამდე მოღწეული ეთნოგრაფიული რეალიები. აღსანიშნავია, რომ ტერმინი „მთის რაჭა“ ხალხურია და სამეცნიერო ლიტერატურაში სერგი მაკალათიას ნაშრომის გამოქვეყნების შემდეგ დამკვიდრდა.

გაზიარება