ალექსანდრე მიქაბერიძე

ალექსანდრე მიქაბერიძე

დაამთავრა თბილისის სახელმწიფო უნივერსიტეტის საერთაშორისო სამართლის ფაკულტეტი. მუშაობდა საგარეო საქმეთა სამინისტროში.

ბავშვობიდან გატაცებული იყო საფრანგეთის რევოლუციითა და ნაპოლეონის ეპოქით. შემთხვევით გაცნობას მოჰყვა მოულოდნელი შემოთავაზება, აესრულებინა ოცნება ამერიკაში – გაეარა სამაგისტრო და სადოქტორო პროგრამები ფლორიდის სახელმწიფო უნივერსიტეტის ისტორიის ფაკულტეტზე. მას შემდეგ უკვე თითქმის ოცი წელია მოღვაწეობს შორეულ მხარეში. ამჟამად არის ლუიზიანის სახელმწიფო უნივერსიტეტის სრული პროფესორი, წარსულში კი ასწავლიდა ფლორიდის და მისისიპის სახელმწიფო უნივერსიტეტებში, აშშ-ს უმაღლეს სამხედრო საზღვაო კოლეჯში და სამხედრო აკადემიაში ვესტ-პოინტში.

ავტორია რამდენიმე ათეული სამეცნიერო სტატიის და ოცზე მეტი წიგნისა. სხვადასხვა წლებში ორჯერ მოიპოვა ნაპოლეონის საერთაშორისო საზოგადოების ლიტერატურული პრემია. მონაწილეობა მიიღო აშშ-ს სამხედრო აკადემიის (ვესტ პოინტის) ახალი სამხედრო ისტორიის სახელმძღვანელოს შექმნაში. ამჟამად კი სათავეში უდგას ნაპოლეონის ომებზე კემბრიჯის უნივერსიტეტის მიერ წამოწყებულ საგამომცემლო პროექტს, რომელშიც მსოფლიოს 100-მდე ისტორიკოსია ჩაბმული.

„არტანუჯმა“ გამოსცა მისი „უცხოეთში დაკარგული ქართველები“, „ქართველები უცხოელთა თვალით“ და „საქართველო უცხოელთა თვალით“; ასევე მისი თარგმანითა და კომენტარებით (ნიკა ხოფერიასთან ერთად) – „ნაპოლეონის მამლუქი – რუსტამ რაზას მემუარები“.

გაზიარება