ვახტანგ კოტეტიშვილის „წერილების“ წარდგინება

სიახლეები


17
იანვარი

ვახტანგ კოტეტიშვილის „წერილების“ წარდგინება

17 იანვარს, 18:30 საათზე, საქართველოს მწერალთა სახლში, გამომცემლობა „არტანუჯი“ გიწვევთ ვახტანგ კოტეტიშვილის „წერილების“ წარდგინებაზე.

 

წიგნი, რომელიც უნიკალური, მართლაც რენესანსული ტიპის მოღვაწის გარდაცვალებიდან 80 წლის თავზე გამოიცა, გვაცნობს მას, როგორც ლიტერატურის კრიტიკოსს, ახალი ესთეტიკის შემქმნელს და ამასთან ერთად, როგორც საზოგადო მოღვაწეს, რომელსაც შესაძლებლად მიაჩნდა ეროვნული და სოციალური საკითხების ჰარმონიზებულად გადაწყვეტა.

 

კრებული ვახტანგ კოტეტიშვილის წერილების პირველ პუბლიკაციებსა და რეპუბლიკაციებს წარმოადგენს, რომელიც მეოცე საუკუნის 10-20-იანი წლების პრესამ და ვახტანგ კოტეტიშვილის პირადმა არქივმა შემოგვინახა. წერილები როგორც კონკრეტული პიროვნების, ასევე იმ რთული და წინააღმდეგობრივი ეპოქის უტყუარი სურათია.

 

შეადგინა, გამოსაცემად მოამზადა, წინასიტყვაობა და კომენტარები დაურთო ნონა კუპრეიშვილმა.

 

რედაქტორები: ამირან არაბული, ნანა კოტეტიშვილი

 

წიგნი გამოიცა თბილისის მერიის კულტურული ღონისძიებების ცენტრის მხარდაჭერით.

 

დასწრება თავისუფალია!

მის: ივანე მაჩაბლის N13

 

მის: საქართველოს მწერალთა სახლი

მაჩაბლის ქ. N 13


გაზიარება