გია ბუღაძის წიგნის – „200 ამბავი მხატვრობაზე“ – წარდგინება

სიახლეები


30
იანვარი

გია ბუღაძის წიგნის – „200 ამბავი მხატვრობაზე“ – წარდგინება

30 იანვარს, 19:00 საათზე, საქართველოს პარლამენტის ეროვნული ბიბლიოთეკის საგამოფენო დარბაზში გამომცემლობა „არტანუჯი“ გიწვევთ გია ბუღაძის წიგნის – „200 ამბავი მხატვრობაზე“ – წარდგინებაზე.

 

წარდგინებაზე მოსულ სტუმრებს ავტორი, გია ბუღაძე მოუყვება რამდენიმე ამბავს წიგნიდან. წიგნის შემდგენელი, მარიამ უგრეხელიძე წიგნზე მუშაობის პროცესზე ისაუბრებს. 

 

„200 ამბავი მხატვრობაზე“ სერია „თან საკითხავის“ პირველი წიგნია, სერიის შესახებ მისი მთავარი რედაქტორი ბუბა კუდავა ისაუბრებს. 

 

 

მოგეხსენებათ, როგორ უჭირთ ადამიანებს დღეს კითხვა.

 

დაძაბული გრაფიკი, ცხოვრების ჩქარი რიტმი, ცოტა დრო, ბევრი საფიქრალი, ინფორმაციის მიღების მრავალი სხვა საშუალება... 

 

გამომცემლობა „არტანუჯის“ ახალი სერია – „თან საკითხავი“ ერთგვარი გამოსავალია ამ საყოველთაო უდროობის დროს.

 

დიახ, თან-საკითხავი.

 

საკითხავი „სხვათა შორის“, საკითხავი თანდათანობით, სვენება-სვენებით თუ ერთი ამოსუნთქვით. საკითხავი კეთების პარალელურად. ადვილი და საინტერესო საკითხავი. საკითხავი დასვენებისას, მგზავრობისას, თუნდაც მუშაობა-მუშაობისას. საკითხავი ავტობუსში, მანქანაში, თვითმფრინავში, მატარებელში... 

 

თითოეულ გამოცემაში ერთი საინტერესო თემისა თუ პიროვნების შესახებ შეკრებილი, გასაგები და უშუალო ენით დაწერილი, მცირე მოცულობის ძალზე საინტერესო „ამბები“ მოიყრის თავს. ეს ნაწილები არ იქნება ერთმანეთზე გადაბმული და დამოკიდებული. 

 

ასე, ნაკვეს-ნაკვეს კითხვა წიგნის ნებისმიერი ნაწილიდან შეგვიძლია დავიწყოთ და ნებისმიერ დროს შევწყვიტოთ, ნებისმიერ დროს განვაახლოთ და შემდეგ ნელ-ნელა ჩავამთავროთ. ან არც ჩავამთავროთ...

 

 

დასწრება თავისუფალია!

მის: ლადო გუდიაშვილის N7


გაზიარება