იონა მეუნარგია
თხზულებანი (ტომი I)

გამომცემლობა "არტანუჯი" იწყებს იონა მეუნარგიას შემოქმედებითი მემკვიდრეობის გამოქვეყნებას განახლებული სამეცნიერო აპარატით _ შენიშვნებითა და კომენტარებით. იონა მეუნარგიას თხზულებათა პირველი ტომის გმირებს ერთი გამორჩეული თარიღი ამთლიანებს: 1832 წლის შეთქმულება, რომელმაც განაპირობა მათი ცხოვრების გზა, შემოქმედება და ფასეულობები. ალექსანდრე ჭავჭავაძე, გრიგოლ ორბელიანი, ნიკოლოზ ბარათაშვილი და გიორგი ერისთავი განასახიერებენ მეცხრამეტე საუკუნის რთულსა და წინააღმდეგობრივ საქართველოს _ დაპყრობილი, მაგრამ გაუტეხელი ერის სულისკვეთებას. ამავე ტომში პირველად ქვეყნდება იონა მეუნარგიას "ავტობიოგრაფია", რომელიც მწერალმა გარდაცვალებამდე ორი წლით ადრე დაწერა. წიგნს ერთვის როსტომ ჩხეიძის წინასიტყვა _ "ბიოგრაფოსის ხვედრი და ვალი", სადაც თვალსაჩინოდაა მოცემული იონა მეუნარგიას პორტრეტი და მისი შემოქმედების მნიშვნელობა ქვეყნისათვის.
იონა მეუნარგია უსამართლოდ მივიწყებული სახელია ქართულ მწერლობაში. იგი მიეკუთვნება თაობას, რომელმაც განსაკუთრებული წვლილი შეიტანა საქართველოს ეროვნულ-განმათავისუფლებელ და კულტურულ-საგანმანათლებლო მოძრაობაში. წლების მანძილზე იყო წერა-კითხვის გამავრცელებელი საზოგადოების აქტიური წევრი, ინიციატორი და თანამონაწილე არაერთი საგანმანათლებლო პროექტისა; თანამშრომლობდა იმდრონდელ ჟურნალ-გაზეთებში (`დროება", "ივერია", "კავკაზი", "ტიფლისსკი ვესტნიკი", "ნოვოე ობოზრენიე", "კვალი", "მოამბე"). გამორჩეულია როგორც ბიოგრაფოსი. მას ეკუთვნის პირველი ქართული ბიოგრაფიული რომანი "ცხოვრება და ღვაწლი გრიგოლ ორბელიანისა", ბიოგრაფიული ნარკვევები ალექსანდრე ჭავჭავაძის, ნიკოლოზ ბარათაშვილის, გიორგი და დავით ერისთავების, ილია ჭავჭავაძის, აკაკი წერეთლის, სერგეი მესხის, მამია გურიელის შესახებ.

ISBN 978-9941-421-01-3
ფასი: 20 ლარი