დავით ხოშტარია
ძველი თბილისის სასტუმროები

გამოცემაში მოცემულია ძველი თბილისის სასტუმროების სრული ანთოლოგია, უნიკალური ფოტომასალა, პირველი მენიუ და სტუმრები.

ბარონი დე ბაი
"საქართველოში"

ბარონი დე ბაი ფრანგი მეცნიერი, არქეოლოგი და საზოგადო მოღვაწეა, რომელმაც XIX საუკუნის ბოლოსა და XX საუკუნის დასაწყისში რამდენჯერმე იმოგზაურა საქართველოში. სამეცნიერო მივლინების ანგარიშებს იგი მოხსენების სახით პარიზის გეოგრაფიულ საზოგადოებაში კითხულობდა, ხოლო შემდეგ მათ ცალკე წიგნების სახით გამოსცემდა. ნაშრომებს თან ერთვოდა ავტორის მიერ გადაღებული ფოტოებიც. წინამდებარე გამოცემაში შესულია მოგზაურის მიერ პარიზში სხვადასხვა დროს გამოქვეყნებული წიგნები: "საქართველოში", "თბილისი", "იმერეთში" და "აფხაზეთში". პირველად ქართულ ენაზე მკითხველს საშუალება აქვს გაეცნოს ბარონ დე ბაის სამეცნიერო მემკვიდრეობის მნიშვნელოვან ნაწილს საქართველოს შესახებ მისივე ფოტოებითურთ. გამოცემა "არტანუჯის წყაროების" სერიის მეცხრე ტომია. ფრანგულიდან თარგმნა, შესავალი და კომენტარები დაურთო ლეილა მაღრაძემ.

ინგლისური, ამერიკული და რუსული პოეზია
(ახალი თარგმანები)

კრებული აერთიანებს ქეთევან ბეზარაშვილის მიერ სხვადასხვა დროს თარგმნილ მსოფლიო პოეზიის გამორჩეულ ნიმუშებს. რობერტ ბერნსი, თომას მური, ჯორჯ ბაირონი, ედგარ ალან პო, ჯეიმს ჯოისი, თეოდორ ტიუტჩევი, ათანასე ფეტი, ბორის პასტერნაკი, მარინა ცვეტაევა – ეს იმ პოეტთა არასრული ჩამონათვალია, რომელთა შემოქმედების ახალ თარგმანებს ამ წიგნში გაეცნობა მკითხველი.

გრიგოლ რობაქიძე

"დემონი და მითოსი"

მეორე წიგნი სერიიდან "უცნობი გრიგოლ რობაქიძე". გრიგოლ რობაქიძის ესეების კრებული "დემონი და მითოსი" 1935 წელს გერმანულ ენაზე იენაში, დიდერიხის გამომცემლობაში დაიბეჭდა. ამ წიგნმა, ისევე როგორც 1932 წელს იენაშივე გამოცემულმა რომანმა "ჩაკლულმა სულმა", ევროპაში აღიარება დაიმსახურა, საქართველოში კი მათი ავტორი "ხალხის მტრად" შეირაცხა. ჩვენში ეს კრებული, ისევე როგორც რობაქიძის ყველა თხზულება, რამდენიმე ათწლეულის მანძილზე ტაბუდადებული იყო. "დემონისა და მითოსის" დახვეწილ, მაღალმხატვრული ოსტატობით შექმნილ ესეებში ნათლად იკვეთება გრიგოლ რობაქიძის ფართო თვალსაწიერი, ერუდიცია, უმაღლესი ინტელექტი, თემებისა და ინტერესთა ფართო სპექტრი. კრებულში წარმოდგენილი თხზულებების ორიგინალური, ღრმა ფილოსოფიური ნააზრევი თანამედროვე მსოფლიოს პრობლემატიკასაც აქტიურად ეხმიანება. არაა გამორიცხული, რომ მათი ქართული ტექსტებიც თავის დროზე არსებობდა (ან დღესაც არსებობდეს). "დემონისა და მითოსის" სრული ქართული თარგმანი პირველად ქვეყნდება. გერმანულიდან თარგმნა მანანა კვატაიამ.

გრიგოლ რობაქიძე
"კავკასიური ნოველები"

გრიგოლ რობაქიძის "კავკასიური ნოველები" ორჯერ გამოიცა გერმანულ ენაზე – 1932 წელს გამომცემლობა "ინზელის", ხოლო 1979 წელს – "ზურკამპის" მიერ. კრებულს, რომელშიც სამი ნოველა იყო შესული, დიდი პოპულარობა ხვდა წილად. ცნობილი მიზეზების გამო, ეს წიგნი მწერლის სამშობლოში არ დაუბეჭდავთ, მაგრამ ქართველ მკითხველს მაინც მიუწვდებოდა ხელი ემიგრანტულ ჟურნალ "ბედი ქართლისაში" გამოქვეყნებულ ნოველებზე – "ენგადი" და "იმამ შამილ", რომელიც მოგვიანებით ლიტერატურულ პერიოდიკაში დაიბეჭდა და მკვლევართა, გამომცემელთა და, რაც მთავარია, მკითხველთა დიდი ინტერესი დაიმსახურა. "წმინდა ხარის მოკვლა" კი დღემდე უცნობი იყო და საგანგებოდ ითარგმნა გერმანულოვანი გამოცემის წინათქმასთან ერთად (გერმანულიდან თარგმნა თამარ კოტრიკაძემ), რითაც სრულყოფილად წარმოჩნდება "კავკასიური ნოველები" – გამორჩეული ფურცელი გრიგოლ რობაქიძის შემოქმედებიდან.

მაკა ჯოხაძე
"ჩემი დავით კლდიაშვილი"

2012 წელს 150 წელი სრულდება დავით კლდიაშვილის დაბადებიდან. დიდი მწერლის შემოქმედება ყველა დროში აქტიური განსჯის საგანია. იწერება ბიოგრაფიული რომანები, სამეცნიერო გამოკვლევები, ლიტერატურული პორტრეტები – ყველა ცდილობს თავისებურად დაინახოს და წაიკითხოს კლასიკად ქცეული შემოქმედის მემკვიდრეობა. "ჩემი დავით კლდიაშვილი" – ამ სათაურით გამხელილია ის უშუალობა, რომლითაც მწერალი მაკა ჯოხაძე შედის დავით კლდიაშვილის სამყაროში და მის პერსონაჟებზე დაკვირვებით ცდილობს ამოხსნას როგორც კონკრეტული ქვეყნისა და ეპოქის, ისე ზოგადად ადამიანის მარადიული სატკივარი.